中環出更：郭少明贏頭馬又捧盃

寒流揮之不去，不過沙田馬場就好熱鬧。保良局前主席何志豪嘅名駒「一定爆」上陣，搵嚟保良局副主席鄭錦鐘及郭少明撐場。另一位保良局前主席曹金霖嘅「森林活泉」尋日都有份出戰，有人建議將保良局成員馬匹包括「一定爆」、「森林活泉」，加埋莎莎老闆娘兼保良局總理郭羅桂珍隻「締造美麗」串埋一齊，博過三關。結果，頭關、二關三扒兩撥勝出。

尾場焦點落喺「締造美麗」。郭少明專登戴副lucky無鏡片眼鏡助旺運勢，果然愛駒不負眾望，輕易揮低同場所有對手，凱旋而歸，獎金高達四百五十多萬元。而過三關飛，據講每十元投注，派彩逾千元，好和味。聽講鄭錦鐘同郭少明都成功過三關，呢趟認真肥仔。

郭少明又贏馬，千金郭詩慧與妹妹興奮到歡呼拍掌。卓妮留意到，詩慧拎住個Anteprima My Melody Wire Bag，夠晒俏。揀呢款袋有原因嘅，佢英文名叫Melody，襯到絕，細妹就叫Kitty，事關媽媽係Hello Kitty迷。贏咗馬，點慶祝？郭少明話，新年舉家遊拉斯維加斯，忙足一年，要充吓電喎。

保良副主席鄭錦鐘（右一）成功過三關，一家四口拉隊去慶祝。（楊歡成攝）

莎莎太子女郭詩慧（中）拎住Melody Wire Bag手袋，與老公（左）及妹妹Kitty齊撐場。

何志豪新春神秘外遊

有份贏馬嘅何志豪都計劃新年外遊，地點保持神秘，但太太同仔女已先行出發，佢為咗幫「一定爆」打氣，延期出發，估唔到袋三十幾萬獎金。中咗過三關嘅鄭錦鐘心情爆靚，預告團年飯會返媽咪屋企食。佢係潮州人，過年最想收到「壓腰錢」。

卓妮