東方民調：調低強拍門檻埋下計時炸彈

理大應用社會科學系助理教授鍾劍華批評今次事件相當嚴重，更有詐騙之嫌，惟政府處理態度不夠強烈，反應太慢，「到依家發展局局長林鄭月娥與運輸及房屋局局長鄭汝樺都無清晰表態。」

鍾亦質疑，政府反應猶豫，可能是擔心太高調處理會即時遭炮轟，「當時林鄭月娥咁勇修例降低強拍門檻，但原來風險好高，因為只有小型發展商對類似單幢樓或小地盤有興趣！」政府降低強拍門檻時又沒有同時檢討相關的監管法例，而埋下炸彈，成為賣爛樓的幫兇。

反應遲緩 愈鬧愈大

鍾劍華又稱，該樓花於○九年已有人向屋宇署投訴沒有售樓書，但該署只回應指宣傳單張內容不屬監管權力範圍了事，他指政府當時沒有採取及時反應是粗疏大意，「如果早啲介入事件，就唔會搞到依家咁嚴重。」又指「政府冇有效措施打擊炒樓活動，出現呢種事又好似做唔到嘢，令人好失望。」

關注房屋政策小組行動召集人梁玉鳳則批評政府輕視今次事件的嚴重性，又質疑當局知道法律漏洞所以對事件「愛理不理，收收埋埋」，事件愈鬧愈大才無奈跟進。

她又斥，屋宇署亦責無旁貸，事件反映該署「跟唔足」，未能發揮執行角色。而地產代理亦有責任，「大家就好似喺度博大霧，欺負小業主心急收樓，唔知自己權益！」她又呼籲小業主遇到不公平事應站出來投訴，才能有效監管問題。