政情：林健鋒講爛gag教年輕人抗毒
經濟動力舊年發起咗個「同心結力抗毒大行動」，活動尋日舉行閉幕禮，除咗主人家林健鋒（Jeffrey）同梁君彥兩位立法會議員外，大會仲邀請到保安局副局長黎棟國同教育局常秘謝凌潔貞等星級嘉賓出席。Jeffrey致辭時大講爛gag，教在場百幾個年輕人點樣抗毒，在場年輕人反應奇好，估唔到Jeffrey都幾識同年輕人溝通喎。
「食K仔，不如去灣仔！」
Jeffrey話，年輕人成長過程中隨時會遇到好多引誘，如果唔好意思即場拒絕嘅話，不妨可以試吓同對方講：「除咗紅豆冰，乜冰我都唔啱！」、「飲咳水小心腦積水」、「食草？你估我係流？」、「天拿水好吸？你估我係裝修工人呀？」、「食K仔，不如去灣仔！」
姑勿論Jeffrey喺創作方面有冇天分，在場嘅年輕人似乎就好受落喇，班學生聽完之後即時笑聲四起，仲有人拍手附和添。所以話啫，「gag唔怕爛、最緊要受」，相信班年輕人之後都會記住呢幾句說話，亦即係話個活動已經成功咗喇！