政情：唐偉章踩單車必備頭盔保安全
如今做校長，要曉得十八般武藝。好似理大校長唐偉章咁，識夾band之餘，仲係單車高手。尋日相約傳媒朋友及兩位小學同學，齊齊郊遊樂。大家朝早九點幾由大埔出發，踩到去沙田，全程兩粒鐘，唐校長全副武裝，更出動私伙頭盔。
休閒式踩單車，唔少人包括卓妮在內，都揀唔戴頭盔，但戴帽踩單車，喺美國好流行，唐校長語重心長話，咁做等同揸車要戴安全帶咁，唔懶得。
唐校長迷上單車多年，最深刻嗰次，係同細仔喺沙田租車享受單車樂，點知出發唔夠半粒鐘就落大雨，惟有急急還車，好彩單車舖老闆夠人情味，退番一半租車錢畀佢喎。
除咗踩單車，唐校長將挑戰長跑，已報名參加下月尾舉行嘅渣打馬拉松名人賽。理大今年出動逾三千人參賽，人強馬壯，點少得校長嗰份？