食物及衞生局副局長梁卓偉細細個開始學鋼琴，做咗副局後試過露兩手好幾次，官方facebook「上亞厘畢道」就轉載咗佢最近同十四歲嘅鋼琴神童沈靖韜合奏嘅片段，曲目係調子輕快嘅澳洲作曲家班傑明作品《牙買加倫巴舞曲》，兩個人唔使排練一拍即合，大家都好滿意合奏效果。
原來梁卓偉同沈靖韜嘅音樂道路都幾似，大家嘅媽媽都係教音樂嘅，大家都係三、四歲開始學琴。梁卓偉話最懷念英國讀書年代幾乎日日同音樂做朋友，依家就只可以每個禮拜抽幾粒鐘練琴，咁啱舊年九月開始去英國留學嘅靖韜亦都話，英國嘅功課少過香港好多，有時可以成個下晝盡情玩音樂添。
梁卓偉又話，音樂教識佢世界之大要眼界闊啲，要彈好一首樂曲就要先知道創作嘅背景，即係要知道歷史咁話喎。不過年紀輕輕嘅靖韜好似無乜同感，仲話若果無咗音樂，佢嘅人生就好似無乜嘢做咁。