政情：自由黨「尖子攻略」撼葉劉生招牌
自由黨榮譽主席田北俊喺沙田派叉燒飯，惹嚟一場賄選小風波，田少明言清者自清無有怕，派完叉飯，尋日派埋「蚊飯」，夥同主席劉健儀同副主席周梁淑怡，帶住一班高學歷年輕黨員去紅十字會捐血，宣布成立自由黨青年團，血拚以外國著名學府「尖子」做生招牌嘅新民黨。
新民黨今月初成立，被指對同樣攻中產票源嘅自由黨衝擊最大。一個月唔夠，自由黨成立「尖子」兵團，目的顯而易見。青年團有十三人，大多係擁有外國名牌學府背景嘅專業人士，主席李梓敬係美國萊斯大學畢業生，曾任美國眾議員A1 Green辦公室見習生。青年團嘅學歷能否揮低葉劉旗下班尖子，要秤過先至知，但尋日搵嚟被稱為「自由黨鍾嘉欣」嘅年輕女黨員撐場，呢樣嘢就率先跑贏新民黨。
不過，田少否認以青年團抗衡新民黨，稱○八年已着意培育第二梯隊，依家只係發大嚟搞，促進黨內新陳代謝咁話。時間又會咁巧合嘅？唔知葉劉信唔信呢！