政情：毓民勢要挖空社民連
社民連過去半年連綿不斷嘅黨爭，終於畫上休止符。社記創黨主席黃毓民尋日同黨友陳偉業（大舊）公開宣布退黨，更呼籲支持者跟隨，花盡心思挖空自己一手創立嘅社記，勢要留番個爛攤子畀現任主席陶君行。一直處於捱打狀態嘅阿陶就反而對毓民退黨鬆一口氣。黃派陶派今後各自各精彩，最苦嘅可能係夾喺中間、一直冇表明立場嘅長毛梁國雄。
毓民一直都係該黨嘅靈魂人物，佢尋日召開集思會，有逾六百名支持者蜂擁而至，就連久未露面、早前捲入非禮強姦案嘅「維園阿哥」任亮憲亦到場力撐。所謂「肥水不流別人田」，決定退黨嘅毓民更公開呼籲支持者跟佢走，「冇咗我哋兩個同咁多支持者，你陶君行仲搞得耐咩？我冇任何不捨之意，你哋（支持者）亦唔應該有。」
佢仲絕到喺會場預備好一大疊退黨表格，等支持者打鐵趁熱，即席填表，勢要陰乾社記。不過據悉，尋日出席嘅多為毓民同大舊分別喺九西同新西嘅街坊、以及人網嘅紛絲，真正填表退黨嘅黨員，不足一百人。
全力組「人民力量」
毓民話退黨之後，除咗專注搞「普羅政治學苑」嘅政治班外，更會集中火力與選民力量及前綫等團體組成「人民力量」，喺未來選舉狙擊民主黨，要佢哋票債票償。對於未來會否將「人民力量」發展成為政黨，毓民就笑言：「上次組黨賴咗鋪勁，以後再組要從長計議。」
呢邊廂毓民發起退黨潮，陶君行嗰邊卻似乎有「入黨潮」。因不滿毓民而憤然退黨嘅前秘書長季詩傑同前財政彭義恍等人，正計劃重新入黨，助阿陶重振雄風。阿陶更喺黃陳二人宣布退黨後，火速發表聲明，與對方劃清界線，表明社記今日搞成如斯下場，全因「相關會員」不斷將黨內技術問題上綱上線、動輒抹黑喎。
社民三子現時只剩一子，昔日情誼化為幻影，一直冇就黨內鬥爭靠邊站嘅長毛，尋日亦畀毓民喺會上點名批評。長毛話，對兩名黨友退黨冇覺得特別痛心，直言自己向來獨來獨往，去邊都一樣，但會反省過去半年佢就黨爭問題選擇緘默嘅態度有冇做錯。佢又話，不排除將來會加入其他政黨，但強調公民黨、民主黨及毓民新組成嘅「人民力量」肯定冇機喎。