中環耳目：許曉暉推介社企素食
城市人愈來愈講求健康飲食，唔單止要少肉多菜，更習慣食齋菜。向來力撐社企嘅民政事務局副局長許曉暉（Florence）繼早前撐完社企髮廊後，近日又推介喺灣仔軒尼詩道彰顯大廈一樓間社企「樂農」素食餐廳。餐廳聘用年長待業及聽障人士，令佢哋經過訓練後可以自力更生。
Florence話，樂農素食餐廳喺正佢辦公嘅修頓中心斜對面，夠晒方便就腳，每逢想起食清淡食物，就自然想起「樂農」。樂農午市只提供自助形式套餐，包括三餸一湯一飯及飲品，晚市則有較多菜式選擇，包括不油膩嘅健康炒飯、香煎蓮藕餅、齋菜餃等。其他出名菜式仲有香脆芋蓉餅、香煎蘋果餃、南乳齋煲、秋葵雙耳等，味味菜都用心製作。
樂農素食餐廳仲出售有機副食品及小食，Florence就好鍾意餐廳嘅麥芽糖及花生糖，每次幫襯更加會睇吓有乜野心水靚貨，買返屋企同家人一齊分享。
卓妮