中環出更：肥亨出口救鄭文雅一命
打高球變數多，崖上打波，好易將個波打落山。保良局上周五喺清水灣鄉村俱樂部舉行慈善高球賽，曾創下一桿入洞紀錄嘅中策集團主席馬時亨，夥拍資深高球教練兼前港姐鄭文雅（Olivia）等人組隊參賽。期間，隊友兼前保良局總理羅志豪爸爸羅文彬一桿將波擊至八呎深山崖，Olivia一馬當先，想爬落山執波，幸好及時被肥亨阻止。
Olivia曾多次獲選為香港最佳女子高球手，爬山執波，本來好濕碎，但為免伊人擦傷手腳，肥亨即時制止:「咁高，唔好喇，好危險。」呢個時候，另一位隊友二話不說跳落山坡執波，佢係邊位？之唔係藝人石天叔囉。拍過唔少動作片嘅石天，寶刀未老，三扒兩撥執番個波上嚟，咁抵得諗，抵拍掌以示鼓勵嘞。
講起打高球，係肥亨近期嘅「飛佛」，喺風光明媚嘅郊外邊呼吸吓新鮮空氣，肥亨話，人都醒神啲。
卓妮