中環出更：周國豐為囝囝換晒傢俬
去年添丁嘅周國豐（Brandon），有子萬事足，除用心發掘囝囝周禮淳嘅音樂天分，近日仲換晒客廳傢俬遷就兒子，周太Jenny話，兩公婆結婚時買落嘅唔少家具，尖角太多，兒子逐漸學行，好易撞到整傷，靚傢俬只能割愛，所以老套都要講句，父母愛子之心，無論邊個年代都係無微不至。
沙田馬場尋日好熱鬧，唔使湊仔嘅Brandon，拉埋太太入場會友，兩口子呢排忙執屋，丟咗唔少新簇簇傢俬，聽落好嘥，原來有原因嘅。Brandon話，起初組織二人世界時，買落唔少潮流傢俬，款式夠型，可惜尖角唔少，衡量之下，決定花五位數字換晒佢。換走嘅傢俬用得唔好嘥，Brandon正聯絡老友，啱就送畀人。
卓妮轉頭撞見「造紙大王」李運強夫婦，講起流感肆虐，李主席話冇有怕，今年係佢第三次打定流感針，感冒果然少咗好多。浸大校董會主席王英偉都話預防勝於治療，一早打晒預防疫苗，百毒不侵。
王國強劉展灝肉緊睇賽馬
同場仲有廣東社團總會主席王國強（K.K.），佢為愛駒「金滿城」打氣，工業總會主席劉展灝亦有隻「分秒必爭」同場較技。「金滿城」賽前大熱，K.K.寄望甚殷，合共投注一萬元，「分秒必爭」就冷少少。開跑一刻，兩人並肩肉緊地觀戰，K.K.一度緊張到緊握拳頭，可惜兩駒最後三甲不入。
輸馬嘅K.K.依然笑意盈盈，預告年三十晚會親自下廚，煮番幾味賀年拿手小菜，包括髮菜蠔豉、炆冬菇及白切雞。子女平時各有各忙，新年點都要聚首一堂，享受天倫之樂。
卓妮