政情：副局政助練跑備戰馬拉松
一年一度嘅渣打馬拉松下月廿日舉行，又係跑手大展身手嘅時候。四位副局長及政治助理今年都組成「問責制四人組」落場，包括商務及經濟發展局副局長蘇錦樑（Greg）、運輸及房屋局副局長邱誠武、教育局局長政治助理楊哲安（Jeremy）及保安局局長政治助理盧奕基。Jeremy、阿Greg同阿盧尋日就約埋練跑。
朝早八時十五分，三人穿着短褲跑鞋，齊集寶雲道公園熱身，然後向東面司徒拔道跑去。三人之中，以年輕嘅Jeremy跑得最夠幹勁，而做過紀律部隊嘅阿盧亦寶刀未老，兩人經常帶頭跑在前面，但阿Greg都好落力，跟得好貼。跑到中途，Jeremy仲教阿Greg同阿盧使用路邊嘅公共健身器材，做起來有板有眼，原來Jeremy十年前已喺英國倫敦跑全碼馬拉松。
Jeremy憶述話，當年第一次參加馬拉松就跑全碼，感覺好開心，幾萬人陪住一齊跑，沿途經過好多倫敦著名地標，幾經辛苦跑到白金漢宮終點站。不過，Jeremy話自從加入政府後已好少時間跑步，只係返屋企湊女當舉重。至於阿盧已經係第四次跑馬拉松，可謂經驗豐富，做過警察嘅佢，體能方面一直訓練有素，跑馬拉松對佢嚟講無乜難度，反而阿Greg只係去年喺北區用繩帶過班失明人士跑馬拉松，佢仲自嘲可能到時要Jeremy用繩拉住佢跑喎。