政情：黎棟國打流感針「保安」
流感高峰期又殺到，連打咗流感疫苗針嘅都一樣中招，問你驚未？！連續打咗流感針十年嘅保安局副局長黎棟國下星期都會去打針。黎Sir話，咁多年嚟同屋企人都有打流感針，托賴咁耐以來無中過招，所以會繼續打。黎Sir仲好熟行咁話，一支疫苗有效期係半年，每年進入流感高峰期之前，佢都會做好準備，同屋企人去睇開嘅家庭醫生度打定支針看門口。不過今年工作忙，推遲咗少少，下星期先去打。至於佢兩個寶貝孫就住喺澳洲，依家澳洲係夏天，所以無預佢哋。
講開流感，個人衞生最重要。尋日黎Sir出席「油尖旺區節」，同現場逾二千名區內人士一齊食盆菜，不過唔使擔心，大家都係用公筷「撈起」，好有衞生意識。黎Sir以前係油尖旺街坊，對呢區好有親切感，周圍同人打招呼，毫無架子，佢仲笑言自己好為食，每次返嚟油尖旺，除咗行街買嘢，一定去搵好嘢食。佢話最懷念以前踎大牌檔嘅日子，因為好有風味，依家搬咗入大埔，大牌檔嘅風味都搬咗上街巿，所以佢有時都會上去熟食檔「搵食」。