大律師公會尋日舉行周年大會，每年一次嘅主席選舉揭盅，由印裔副主席、○九年成為資深大律師嘅林孟達（Kumar Ramanathan）喺無對手下自動當選，接替已冧莊兩年嘅高浩文（Russell Coleman），即係話，大律師公會嘅新當家，繼續係外籍人士。如果講風頭，會再輸畀香港律師會。
消息話，高浩文雖然表現唔錯，但畢竟同中文傳媒唔係同聲同氣，連帶大律師公會嘅曝光率都一齊跌Watt，過去兩年嘅聲勢輸咗畀由王桂壎做會長嘅律師會。
所以，公會都好想搵番個華人當家，只係合適嘅華人大狀中，資深嘅好多以前已經做過主席，新人又寧願瞓身搵真銀，打鑼都搵唔到人。
反觀外籍大狀，佢哋一向對大律師公會主席一職好感興趣，因為坐到呢個位，足證實力獲認同，身價都唔同晒。林孟達過往相對低調，佢嘅政治立場係點，就要等上任後至知嘞。