政情：葉偉明派環保梘吸街坊票
新界東街坊都幾幸福，近排自由黨榮譽主席田北俊已經先後幾次落區派叉燒飯，尋日就輪到工聯會立法會議員葉偉明。葉偉明「積極考慮」喺新界東出選立法會已經人盡皆知，尋日就同班義工一齊派出五百個環保梘，葉偉明仲落手落腳用環保梘示範洗碗碟，吸引唔少路過嘅街坊觀看，不斷請教葉偉明點樣用舊梘洗嘢先洗得乾淨。
原來佢哋早排去咗大埔唔同嘅食肆收集廢油，再將啲油製成四千幾塊番梘，葉偉明尋日特意將啲製成品拎去派街坊，起初大家都唔係好為意，反應只屬一般，不過由於喺正街市門口位，慢慢人流愈來愈多，葉偉明又戮力示範，最終吸引到唔少買完餸嘅街坊注意，高峰期都有成廿個人圍住睇㗎。
最搞笑係，有位太太突然問葉偉明平時有冇洗碗，葉偉明即時好男人上身，話自己喺屋企雖然負責「煮」，但係會負責「洗」㗎！現場所見，街坊雖然未必個個識佢，但大家收到舊環保梘都好開心，加上工聯會義工仲將印有環保梘製法同葉偉明個名嘅宣傳單張一齊派，點計都算成功啩？