政情：拒捐「關愛」陳啟宗恐後遺症
我哋尋日踢爆，關愛基金內部運作亂糟糟，言猶在耳，曾公開表態拒絕捐款嘅恒隆主席陳啟宗，尋日又出嚟寸爆關愛基金。佢忽然擔心，話好驚唔肯捐錢會有後遺症。示弱唔係「大孖沙」習慣，更不是陳啟宗嘅做事作風，佢以退為進，其實係暗踩港府小器記仇，今次事先張揚報定案，有全港市民做證，港府高層仲敢動佢分毫搞「秋後算帳」咩！
上年十月施政報告公布關愛基金大計，交由「條條fing」唐英年主理，陳啟宗第一個表態拒絕捐款，仲嘲諷港府獨裁如印尼前總統蘇哈圖，從此陳啟宗成為反對關愛基金嘅代表性人物。生意人數口精，事隔三個月，關愛基金前日首次開會，象徵正式啟動機器投入運作，陳啟宗唔遲唔早尋日再度發炮，真係夾都無咁準。
陳啟宗以「香港明天更好基金」主席身份同傳媒會面，佢鄭重澄清，對關愛基金嘅憂慮，重點唔係關注啲善款點使，而係破壞咗政府同商界關係愈透明愈好嘅原則。佢話，自己係「富有乞兒」，每年幫唔少好似明天更好基金呢一類非牟利機構募捐，講到揼心口之術，佢都略知一二，港府先公布一個空空如也嘅關愛基金，然後再叫人捐錢，「即係叫大家識做啫」，喺咁嘅情況下，「有冇人可以同我保證，我唔捐錢，係無後遺症先？」
閉門造車隨時「印尼化」
陳啟宗警告，指唔擔心港府會畀着數捐錢畀關愛基金嘅商家，但擔心唔肯捐錢，「會有預料唔到嘅後果」，如果政府唔講清楚呢個問題，香港隨時走向「印尼化」，事關當年蘇哈圖主政印尼，又係每隔兩、三年就向大企業「募捐」，要企業將未來幾年嘅數個百分點盈利捐畀政府，當時印尼嘅經濟點樣，大家有目共睹。
陳啟宗眼中，邊個高官最似蘇哈圖，只有佢心中有數，但在場記者人人睇得出，陳啟宗嘅「後遺症」憂慮，好明顯有切膚之痛，有感而發，唔通佢三個月前公開拒捐，咁快就感受到政府嘅無形壓力？陳啟宗聽到呢個問題，即刻一邊向記者斟茶，一邊打哈哈，就係唔回應，只係強調好多商界人士私底下都好認同佢呢套講法。