中環耳目：余錦基愛飛驒牛夠「和」味
日本和牛享負盛名，前晚日本岐阜縣政府舉行飛驒牛春日盛宴，慶祝飛驒肉食中心首次成為香港認可肉食輸出機構，老友多多嘅前足球總會主席余錦基今次已經係第六次品嘗飛驒牛，之前香港未有得賣，佢啲朋友特登用私人飛機空運返嚟畀佢品嘗，認真好人緣。
私竇歎鮑汁碟頭飯
基哥鍾意飛驒牛肉質嫩滑，而且肥膏嘅分布好均勻，口感唔會太肥膩。基哥向來係日本美食嘅支持者，鍾意佢煮法清新，以前因為生意關係，個個月都要去日本一次嘅佢，依家都會定期過去日本祭下五臟廟，不過佢話以前就算係喺街邊嘅拉麵或者平民咖喱飯店，一樣可以做出好高嘅水準，但係近年唔知係咪經濟唔好，要將貨就價，所以水準退步不少。
不過基哥都好明白，食肆要長久保持一貫水準唔係咁容易，好似香港嘅雲吞麵都唔係間間好味，所以佢喺中環只係用嚟招呼好朋友嘅私竇，基哥睇得好實，經常去試菜做QC，中午飯仲多數喺嗰度食。基哥話佢中午多數食碟頭飯，好似鮑汁鱆魚飯或者鮑汁鴿片飯等。原來世間上有咁刁鑽嘅碟頭飯！