中環出更：張天愛演繹自家羽毛冬裝
本身係時裝設計師嘅張天愛（Flora）自從嫁畀羅素後，人如其名，蒙上天寵愛，愛情、事業兩得意。Flora每次去ball都悉心打扮，前日出席貿易發展局香港時裝騷，以大紅羽毛背心皮草襯黑色羽毛裙，飄逸如仙女下凡。
呢身設計，係Flora最新嘅collection，靈感來自動物身上嘅羽毛，Flora用紅如火燄嘅纖長羽毛製成皮草衣領，再將黑色羽毛變身層次感十足嘅羽毛裙，拎埋個Furla皮草手袋，整個Look充滿冬日瑰麗色彩。
赴美捧譚元元場
嚟緊新年，Flora已將節目排得密麻麻，先同老公飛美國羅省度歲，之後再飛三藩市，欣賞著名芭蕾舞蹈家譚元元嘅演出，本身芭蕾舞造詣頗高嘅Flora曾公開講過，譚元元係佢最尊敬嘅舞者，兩人私交甚篤，今次再碰頭，一定好happy。Flora潮流觸覺敏銳，卓妮問佢，今年有乜必買物品，Flora不假思索話：「iPad！」，真係追貼潮流喎。