中環出更：伍穎梅甜絲絲避談派利是
農曆新年無論派利是或收利是，對於適婚嘅男女嚟講，都係一件敏感同難為情嘅事，但亦可以感覺好甜蜜。正在蜜運嘅「九巴金公主」伍穎梅（Winnie）同男友許晉平感情穩定，好多人關心佢哋幾時好事近，卓妮尋日就喺明天更好基金活動上問Winnie幾時派利是，會否做兔新娘，佢就甜絲絲笑唔停，含羞答答話唔好問呢啲嘢喎！
每年農曆新年都係名人離港外遊嘅黃金期，但Winnie就自爆今年唔會外遊，聲言要留港體驗過年味道，相信有愛情滋潤嘅新年會零舍唔同。
曾浩輝收紅包尷尬
講到過春節，Winnie話最回味屋企年屆八十多歲老工人有姐整嘅蘿蔔糕，落足料唔在講，佢特別期待係揭開鑊蓋一刻釋出嘅蘿蔔糕香味，加上同有姐嗰份深厚感情，同外間售賣嘅蘿蔔糕真係無得比。
身為「鑽石王老五」嘅衞生防護中心總監曾浩輝就對收利是感到特別難為情，佢尷尬話自己咁大個人仲
緊利是，問佢最高峰有幾多進帳？佢嘅答案係「秘密」。同曾浩輝傾開，原來佢個家族好多成員，佢爸爸有七兄弟姊妹，所以過年氣氛濃厚，年初一例必到大伯父屋企拜年，初二就去媽媽親戚屋企，初三就等人嚟拜年，長輩咁多，唔怪得佢話利是到唔好意思喇。
李國棟罷食吞拿魚
過年外遊一樣咁高興，馬會大董李國棟嚟緊農曆新年會同太太去日本旅行，現時日圓匯率高企，李國棟都大呻「無陰功」，問佢會否叫太太少啲購物，佢就笑而不語。
近期世界各國響應罷食藍鰭吞拿魚，以保護自然生態，李國棟都話會響應唔食吞拿魚，佢話呢個世界仲有好多嘢食得，唔一定要食吞拿魚喎！
卓妮