政情：陳家洛掌舵圓父心願
中國人幫子女改名，好多時係反映出佢哋對下一代嘅期望。好似公民黨新任主席陳家洛咁，個名就同武俠小說中「反清復明」嘅紅花會總舵主一樣，原來實非巧合。公民黨去年同社民連聯手搞「五區公投」，變成走激進路線嘅反對派，如今家洛又當選為公民黨主席，都算係圓咗佢老父心願。
家洛尋日接受電台節目訪問時透露，當年行船嘅爸爸知道屋企就快有新成員降臨，有閱讀報刊連載武俠小說習慣嘅陳爸爸，決定借用紅花會總舵主嘅名字為囝囝起名，於是就有咗今時今日嘅陳家洛啦！呢個名亦為家洛帶來不少趣事，除咗被人暱稱為「總舵主」或者「當家」外，亦令小家洛唔知點向老師解釋何解改呢個名。
小說中嘅陳家洛大搞反清復明，現實中嘅家洛則參與「五區公投」，當然家洛唔覺得公民黨走激進路線啦，仲話唔信咩井水犯河水論，事關中國人血濃於水，所以歡迎以任何形式同中央溝通。不過家洛以低票當選主席，呢個總舵主能否壓陣，仲要拭目以待。