政情：發叔：輸村選咪退休囉
前排因感冒加肚屙搞到入院休養嘅行會成員兼鄉議局主席劉皇發，尋日終於復出。發叔朝早出席完行會，下晝又主持今屆鄉議局最後一次議員大會，整日心情勁靚，仲宣布捐出三百萬元慶祝鄉議局新大樓落成。一眾鄉紳即時有反應，通過喺新大樓中庭天井後方放置發叔嘅全身銅像。
發叔科水三百萬元，其中一百萬元用作編印《新界鄉議局史》，準備喺新大樓開幕禮當日作為紀念品送畀嘉賓。不過，大會尋日討論呢部「史」嘅初稿，有鄉紳質疑內容太簡單，每件史事一句起兩句止，有啲關乎發叔嘅威水史更加無記載，要彈番轉頭寫過，但就未必趕及新大樓開幕當日派發。
現正進行嘅村代表選舉爆出唔少意外結果，發叔承認今次村選形勢混亂，好似新田鄉事委員會主席文富穩喺村選落敗，佢都好意外，話可能係溝通問題造成喎。嚟緊星期日輪到發叔所屬嘅屯門龍鼓灘村代表改選，佢同三位候選人爭奪兩個村代表席位，發叔處之泰然話：「我嘅命運交畀村民，如果輸咗咪退休囉！」