政情：阿陶發聲明反擊大舊
黨爭不斷嘅社民連尋日忽然發聲明，為大舊陳偉業喺行政長官答問大會嘅發言道歉，聲稱收到會員同市民投訴，不滿大舊當日言論。聲明仲指摘「陳議員伺機攻擊本會同仁，誣陷事實，不斷抹黑，實有違市民對本會立法會議員的期望。」社民連副主席吳文遠尋日回應話，聲明得到過半數行委成員同意才發出，事前無諮詢大舊，仲寸大舊喺議會講嘢前都冇諮詢佢哋啦，原來係「禮尚往來」！
事緣喺上星期四嘅答問大會上，大舊質詢時話自己掟蕉、掃枱甚至示威不計其數，但踢爆有人去過新花都夜總會、醉駕就畀人叫收聲，佢跟住問曾蔭權點解冇叫佢哋收聲？發完無厘頭牢騷，佢就轉移話題，社民連當日冇反應，估唔到事隔五日先出招。
大舊提及嘅新花都事件，係指社民連創黨主席黃毓民舊年年底喺網上電台爆料，話阿陶曾被該黨前秘書長季詩傑帶去新花都夜總會，再加上近期嘅維園阿哥事件，陶派同毓民派幾近決裂。難怪大舊尋日對阿陶出信好不滿。大舊話佢冇做錯事，個黨根本唔需要「代」佢道歉，仲批評阿陶出呢招係企圖轉移視線兼醜化佢喎，真係家無寧日。