政情：田少派叉飯 細佬寸嘥料

田少復出之路荊棘滿途，僅喺新界東出山派叉燒飯呢個頭炮，已被該區立法會議員湯家驊及梁國雄質疑有賄選之嫌。田二少尋日以副主席身份出席新民黨總部開張誌慶時，本來都話不願再評論舊黨嘅事，只謂呢啲小恩小惠嘅事，各黨派都會做。但其後竟愈講愈起勁，直踩阿哥派飯呢招成效好低：「你做到，其他黨一樣做到，中國人係講心意嘅！」

唔知係咪講開停唔到口，田二少繼續話，自己以前喺自由黨都有派過嘢，但好多時嚟攞嘅市民都唔知佢係乜頭乜路，相反依家自己不時落區派揮春、表演魔術，比派貴重嘢更珍貴喎，又出言諷刺大佬：「如果你派嘅嘢價值高，市民都唔知係為佢（飯盒）定為我。」

田北俊以德報怨

田二少後來唔知係咪發現自己講大咗，主動補鑊話：「其實大少依家連船都唔坐、孫都唔湊咁落區，已經係一個大轉變啦，派飯都係一番心意啫，食咗真係選佢咩！」不過佢呢番話有幾大誠意，大家咀嚼吓就知道係咩味道囉。

面對外界連番質疑批評，田大少一於少理，尋日如期第二次落區到沙田派發百幾盒叉燒飯。佢首先強調自己冇賄選，主動踢爆質疑佢涉賄選嘅湯家驊，都喺該區派發過幾百隻糉：「派糉同派飯概念上有咩唔同？身為大狀嘅佢係咪都走緊法律罅？」不過講到細佬，佢就好厚道話，相信二少唔係寸佢，而係出言幫佢喎：「佢咁講都幾好吖，佢話我成效低，即係證明我派飯唔係為選票囉！」

田二少今次出言嘲諷大佬，究竟係想反面證明佢大佬冇賄選，定係有心潑大佬冷水，佢自己心知肚明。不過佢離開自由黨時搞到好不愉快，任何關於佢舊黨友甚至大佬嘅言論，都充滿無限想像空間，好易予人「相煎何太急」嘅慨嘆！