中環出更：黎棟國精靈乖孫 斤両十足
保安局副局長黎棟國同政治助理盧奕基經常「行孖咇」，卓妮尋日路過中環國金中心，就撞到佢哋兩位大哥，梗係要上前打個招呼啦，點知黎Sir好幽默，自嘲大家係「兩隻走在一起嘅刺猬」。刺猬？唔係好嘢噃！非也。身為天主教徒嘅黎Sir解釋話，曾經聽過神父講一個有關刺猬嘅故事，話刺猬身上雖然有好多刺，但有兩隻刺猬每逢冬天就好鍾意黐埋一齊，有時會拮吓對方，但走在一起總會溫暖啲，大家不妨慢慢咀嚼。
四個月大重廿磅
黎Sir心情咁靚，原來本月六日啱啱去咗澳洲悉尼探望一對乖孫，前後逗留咗一星期；細孫仔Bodhi只有四個月大，但精靈活潑，黎Sir一講起就笑不攏嘴。佢話Bodhi雖然比預產期早一個月出世，但相當食得，食量拍得住三歲大嘅姐姐，每隔三個鐘就飲一次奶，每次180ml，相當於六安士，四個月大已經重近二十磅，絕對係超級BB！
其實黎Sir好鍾意澳洲，佢兩位公子都喺澳洲讀書，就讀當地著名大學University of Wollongong（臥龍崗大學），唔怪得臥虎藏龍啦！大仔畢業後返咗香港，細仔就留喺當地發展，成家立室，難怪黎Sir一放假就飛過去澳洲探孫，順道享受自駕遊嘅樂趣，皆因澳洲同香港一樣都係行英制，揸右軚車。
黎Sir話，每次去澳洲，佢都好鍾意租番架車自駕遊，甚至坐內陸機去周邊地方玩，好似塔斯曼尼亞同藍山咁，都係佢嘅至愛。佢記得有次揸咗三、四個鐘頭車去藍山，咁啱當地做緊花卉展，令佢有機會見識當地人嘅私家花園，連佢都話大到無人信。不過人生路不熟，有時靠GPS（衞星定位系統）揸車，會行咗好多冤枉路，無計喇！