中環出更：中出商會青年軍私竇歎粵菜
好多愛國社團或商會都會組織青年部培訓生力軍，好似香港中華出入口商會青年部就肩負培訓年輕會員嘅重任。中出青年部喺前主任許華傑（Michael）帶領下已搞得有聲有色，到近年公民教育委員會主席李宗德嘅愛女李美辰接棒做主任，繼續發光發熱。中出青年軍好團結，每月聚會都揀番位於上環嘅中出會所「庭苑」舉行，品嘗出色嘅懷舊粵菜。
獲撥款研究中小企
中出青年部成立多年，雖然成員以中小企及貿易公司背景為主，但青年一代好多都留過學，亦有唔少專業人士，人才濟濟。好似做過兩年青年部主任、啱啱榮升副會長嘅Michael，本身就係康奈爾大學嘅畢業生，被視為下屆中出立法會議員接班人。至於早前冧莊繼續做主任嘅李美辰，則喺父親旗下和富企業幫手，佢老公蔡德昇亦係青年才俊，喺太平洋航運（香港）財務部做經理。
其他成員仲有黃銘斌，喺鄧普頓基金下面嘅DARBY達弼亞洲投資者（香港）做私募基金，佢太太正係張祝珊後人、百仁基金成員許晶晶。仲有經營家族皮草生意嘅單曉斌、專營玩具槍生意嘅秋星實業廖宜春、智道總會常務副主席梁立勤、做環保及基建生意嘅德昌有記董事李德剛等。最近中出獲政府撥款七十萬元，同浸大合作，由Michael領軍，帶呢班年輕人做一份中小企研究報告，調查研究基本完成，目前正撰寫報告。
講番當晚呢班青年部才俊一齊喺中出會所「庭苑」聚餐，董事總經理兼總廚周國庭特別為佢哋炮製咗幾味拿手家常菜，包括金稻海中蝦、古法蒸斑片、拔絲咕嚕肉、庭苑脆皮炸雞、甜梅菜蒸蘭遠等。「金稻海中蝦」選用大隻嘅新鮮靚海蝦開邊，配以蒜蓉炒香嘅糯米一齊蒸，食落好香口。
另一味「拔絲咕嚕肉」，由麥芽糖、野生蜂蜜及蔗糖製作拔絲，混合即炸嘅咕嚕肉，外脆內裏多汁。周師傅話，呢味菜最難係糖嘅調味，要恰到好處。至於周師傅曾經獲獎嘅「庭苑脆皮炸雞」，則選用清遠或龍崗嘅走地雞，烹調重點係先將雞吊乾身，雞皮夠油，醃製後落鑊炸，製成皮脆、肉滑嘅脆皮炸雞。不過「庭苑」行會員制，要入會至有得品嘗。