○八年尾的士堵塞北大嶼山公路一役，街工梁耀忠開記者會炮轟房屋及運輸局副局長邱誠武唔肯聽的士司機大佬嘅電話，要對風波爆發承擔責任，可能從此之後，副局見到阿忠都怕怕，喺聽日立法會大會上，阿忠明提質詢，實係投訴，批評近期約晤部分副局商議政策，不時遭到拒絕。其實，阿忠成日公開攞副局開刀，小心阿崩叫狗，愈叫愈走喎。
阿忠話，佢不時約晤部分副局商議政策，但近期屢遭拒絕，至少食咗兩次檸檬，感覺好無癮，批評政府用咁多錢請副局，聲稱要培育政治人才，但副局唔肯同議員接觸，「點培育到政治觸覺呢？」不過，阿忠死都唔肯透露畀佢食檸檬嘅副局名字，話可能其他副局對立法會議員都一樣咁「冷漠」；如果只係講佢遇到嗰兩個，咁就對呢兩位副局太唔公平喎。
阿忠既然要搵副局嚟開刀，但又要錫住佢哋，聽落都幾矛盾。不過，點都好，官員同議員都係使緊公帑，希望阿忠同班副局以後可以衷誠合作做番啲嘢，唔好淨係喺度互相指摘。