政情：關愛基金委員名單分餅仔

陳恒鑌入醫療小組!?

向來搞開社企嘅公民教育委員會主席李宗德同菁英會常務副主席洪為民，今次都上榜，加入青年事務委員會主席陳振彬主持嘅民政小組委員會。上次被梁栢賢力壓、無緣坐正醫管局行政總裁嘅張偉麟醫生，亦加入醫管局主席胡定旭主持嘅醫療小組。民建聯離島區議員周轉香同荃灣區議員陳恒鑌，亦分別成為上述兩個小組嘅增補委員。咪住！陳恒鑌似乎同醫療風馬牛不相及喎，莫非佢有啲鮮為人知嘅醫療知識？

雖知道關愛基金掌握大筆撥款，依家入咗關愛基金嘅成員，其所屬及相關團體，都有機會向基金申請撥款，難保唔會出現利益輸送。據悉委員會已引入雙重申報制度，即委員除咗加入小組後要即時申報利益外，當小組傾到具體項目撥款申請，亦要即場申報利益。不過基金資源最後能否公平公正分配，大家就要落足眼力睇喇！