政情：邊太：唔覺意違規參選
香港女童軍總會是非不斷，總監邊陳之娟被密函踢爆超齡違規參選，風波鬧得滿城風雨之餘，更加觸發會內一場總監空缺爭奪戰。呢場女童軍版「金枝慾孽」，隨着新總監之爭結束而落幕，關鍵人物邊太終於首度開腔。佢接受我哋訪問時一再強調，「超齡參選」只係無心之失，但就令自己認清楚邊個係真朋友咁話。
女童軍新總監之爭月初塵埃落定，邊太鐵定四月卸任，一切風雨暫告平息，邊太講嘢亦比以前放得多，一直冇公開回應過「超齡違規參選」風波嘅佢，日前打破沉默，對我哋堅決咁話，自己真係一直冇為意參選總監原來有年齡上限規定，佢仲話，就連世界女童軍總會對領導層都冇呢個規定，所以佢自己同負責搞選舉嘅人都冇為意過，直至件事曝光，大家先如夢初醒咁話。
邊太話對年齡規定睇漏眼，但經此風波，對身邊朋友是友是敵，反而就睇得清清楚楚。事件曝光後，各大傳媒都不時收到踢爆邊太種種疑似違規行為嘅黑材料，邊太話，真係唔知邊個同佢咁大仇口，亦唔想估係邊個爆料，唯一可以講嘅，係事件發生後的確有少少唔開心，件事令佢認清楚邊個係真朋友。
為幼園吸客指控解畫
邊太又反駁，有人質疑佢藉住喺女童軍內一手成立畀四至六歲小朋友參加嘅「快樂小蜜蜂」、為旗下幼稚園吸客，佢都不以為然，話自己間幼稚園有悠久歷史，學位供不應求，唔使用呢啲招數吸客，「唔明點解會拉埋嚟講」。加上佢老公做醫生，令佢更明白專業操守嘅可貴同重要，所以佢強調自己絕對唔會以權謀私，仲話服務社會唔會停步，未來繼續會以副會長身份留喺女童軍服務，亦會繼續過去喺九龍城兒童合唱團、九龍醫院管治委員會等方面嘅義務工作。
訪問尾段，邊太以「性傲皆因經歷少、氣平還受琢磨多」十四字真言同所有朋友共勉，用嚟總結幾十年做義工經驗。不過，計我哋話，佢用呢幅對聯總結自己喺今次風波嘅遭遇，似乎更加貼題喎，唔知邊太點睇呢？