中環出更：許章榮公幹自備私家枕
好多人瞓唔慣陌生床，好似經營床上用品生意嘅雅芳婷集團主席許章榮都一樣，好怕離港公幹瞓着個唔舒服嘅枕頭。佢話枕頭同着鞋好相似，如果唔啱身就會好唔舒服，自然影響睡眠質素，所以佢每逢離港公幹超過兩日，都會帶備私家枕頭，避免瞓得唔好影響工作。
早前喺跑馬地跑夜馬，許章榮都有入場為愛駒「枕住贏」出賽打氣，言談間講起枕頭舒適度。原來佢對枕頭要求特別高，最擔心離港公幹入住酒店嘅枕頭唔舒服，如果住一晚，佢就會用毛巾攝入枕頭，攝到啱位為止，勉強捱一晚，但公幹超過兩日嘅話，就一定帶備私家枕頭嘞。
愛駒名字與睡眠有關
城中好多名人馬主都鍾意用自己經營嘅行業改馬名，許章榮幾匹愛駒名字都同枕頭或睡眠有關，除咗「枕住贏」外，仲有「睡得好」、「睡眠科技」及已退役嘅「枕頭大王」，可惜「枕住贏」當晚三甲不入，但許章榮就好樂觀話，匹馬暫時只係出賽兩次，尚待磨練。
卓妮