中環出更：嶺大雙陳做社企代言人
香港人貪靚又追求時尚，有社企背景嘅優質針織時裝品牌Love + Hope，自從四個月前喺中環士丹利街開咗專門店之後，就受到好多名人追捧，好似「九巴金公主」伍穎梅就係捧場客之一。嶺南大學校董會主席陳智思（Bernard）同嶺大校長陳玉樹尋日特登去L+H嘅工場參觀，兩人分別獲贈價值數千元嘅蘇格蘭茄士咩外套，即時變身L+H代言人。
參觀工場獲贈外套
尋日氣溫只得九度，冒寒到工場為L+H工人打氣嘅Bernard，着住黑色西裝加上黑色羽絨中褸，做足禦寒準備，但略顯沉氣。當佢參觀完工場嘅生產線時，L+H董事何靜瑩（Ada）好識做，送咗件價值二千四百元嘅米白色茄士咩外套畀佢，陳玉樹就獲贈深灰色外套。
兩位大男人貪靚本色不遜於女士，即時將新衫着上身。着中碼嘅Bernard變身後成個人精神晒，大獲好評。陳校長就更加似個穩重書生，兩人都勁讚L+H質素冇得彈。
卓妮問Bernard會唔會帶太太去中環幫襯，佢笑稱太太已經買咗好多佢哋嘅靚衫，事關L+H曾經送咗五百元現金券畀佢，結果太太摸上樓睇衫，最後又點只使咗幾百蚊呢？
復興香港製造標籤
L+H係由香港潮州商會永遠名譽會長莊學山同細佬莊學熹投資，佢哋堅持將整個生產程序留喺香港，又聘用屯門、天水圍一帶嘅女製衣工人，助佢哋重新就業，並且以復興「香港製造」標籤為己任，城中名人對呢種經營理念都好支持，所以唔少人特登去幫襯撐場。
一向低調嘅莊氏兄弟尋日因為出埠公幹冇現身，但身為董事嘅莊學山太太就陪足全程，佢一樣作風低調，全程交由Ada出面解說。退休冇耐嘅前星展銀行中國區副董事長兼行政總裁林劉淑英（Teresa）都喺度，佢啱啱加入董事局，為慈善同推廣出分心力。Teresa都係L+H嘅粉絲，仲成日帶朋友去幫襯，將來L+H嘅發展肯定如虎添翼。
Ada話畀卓妮聽，佢哋今年中就可以收支平衡，依家九成生意做出口，客戶係歐美時裝大戶，本地零售只佔一成。卓妮見工場有好多DURBAN、CERRUTI 1881同KENT & CURWEN品牌嘅衫辦，呢幾個品牌都同利豐集團有關，睇嚟馮國經兄弟為呢個社企出咗唔少力！
卓妮