政情：年宵賣「神棍」寸爆卿姐
維園年宵向來都係政黨團體吸金嘅地方，去年新成立、旨在狙擊白鴿黨嘅「選民力量」，今年亦加入戰團，仲設計咗一系列揶揄白鴿黨副主席劉慧卿嘅產品作招徠。「幫人」製造商機，唔知會唔會激到卿姐紮紮跳呢？
選民力量核心成員「星屑醫生」歐陽英傑尋日同我哋講，該組織今年將會處女下海，到維園年宵擺檔賺經費。頭號產品係一支名為「民主女神棍」嘅吹氣棒，重點係支「神棍」上印有卿姐芳容，箇中意義不言而喻。另一創意產品就係「卿姑七友」吹氣坐墊，供不滿白鴿黨嘅人士作出氣之用。「星屑醫生」係「維園阿哥」任亮憲嘅老友記，任亮憲被指涉嫌非禮及強姦後，呢幾個星期都冇去維園「當值」。呢班老友都是非多多，竟然仲諗到點樣賺錢，真係服咗佢。
面對市民連串狙擊，兼再有十二名黨員退黨，四面受敵嘅卿姐尋日帶領該黨新東支部約二十名黨員召開「晒馬大會」，強調該支部雖然喺過去個多月流失七名區議員，但對支部影響不大，更聲言「立法會一人兩票係民主黨爭返嚟」，有信心該黨可以喺嚟緊嘅區選收復失去嘅議席喎。