政情：吳秋北拒洗腦做「勞隸」
當選勞工顧問委員會勞工界委員冇幾耐嘅工聯會理事長吳秋北，近日忙於參加勞工處方面搞嘅簡介會，日日周身唔得閒。咁誇張？吳秋北透露，原來呢啲簡介會係密集式咁舉行，佢上星期就去咗三日，其中一日仲由朝早九點開到傍晚六點，都咪話唔辛苦。
催逼政府制訂標準工時
吳秋北笑住咁話，勞工處日日幫佢洗腦，除咗介紹勞顧會嘅工作之外，仲不斷灌輸勞工處已經做咗好多工作嘅訊息畀佢。政府呢啲招數可謂司空見慣，不過吳秋北亦唔係省油的燈，雖然係勞顧會新丁，不過挾住「票王」稱號嘅佢又點會咁易畀人洗到腦吖。
吳秋北講到明，工聯會嚟緊一定會着力催逼政府制訂標準工時，唔會畀佢咁易過關。
吳秋北身為工會大佬，外表卻斯斯文文，依家仲讀緊博士學位添。佢透露，篇博士學位論文已經搞掂，之前因為啱啱上任理事長一職，公務繁忙搞到進度慢咗少少，不過依家終於完成，等埋論文答辯過埋關就一天都光晒，真係可喜可賀。