政情：肥平點醒德成民意為先

「唔係某人話想做就做」

申亞撥款甩轆，港府反斥「畀人跣低」，將結果歸咎於建制派。久未露面嘅肥平尋日出席一個宗教活動時，本來一直守口如瓶，不過當我哋提起近日因為申亞而引起嘅風波時，先發現佢原來都係一肚牢騷。佢話，申亞呢家嘢，「唔係某人話想做就做、政府話想做就做、某個團體話想做就做」，最重要係要得到地區民眾支持，否則都係嘥氣。佢咁講，好難唔令人聯想起佢嘅繼任人德成局長啫。

對於港府漠視市民反對聲音，強行向立法會攞申亞撥款，肥平唔肯講港府今次做法係咪「霸王硬上弓」，但就坦言對港府此舉感到「好奇怪」，亦唔明點解市民願意支持東亞運及奧運馬術，偏偏唔肯對申亞賣帳，促請港府內部檢討吓今次有乜甩漏、做錯咗啲乜喎。

問到肥平港府未來如果想再度申亞時，應該有咩準備，佢即時好大反應咁驚叫：「唔係嘛，再申亞？」佢認為，下次一定要市民「舌累」港府申亞，港府先好去搞：「搞體育搞文化永遠都係民間主導㗎啦，市民唔要，政府做嚟做咩？」咁德成局長今次係咪失職先？肥平即刻耍手擰頭，貫徹佢一向慎言嘅作風，吐出一句：「不在其位，不謀其政」。

查實前任高官有唔少都忍唔住要同現屆政府打對台，「退休高官合唱團」嘅成員除咗肥平同時常喺電台開咪嘅王永平，仲有做咗平等機會委員會主席嘅林煥光同前天文台台長林超英等，睇嚟陸續有來，佢哋脫下烏紗後，智慧都高咗好多，好似突然開竅咁。唔通真係「當局者迷，旁觀者清」？定係政府內部中咗詛咒，決定親啲嘢都係錯嘅？