中環出更：愛妻踢爆張永霖未想出山
元旦假期好多人出埠旅行，無論選擇熱帶地區避寒，或者去凍到結冰嘅北國，只要同至愛嘅人一齊就去邊都咁溫馨。前亞視執行主席張永霖（Linus）夫婦同埋大家樂集團太子女陳浩寧（Candice）同男朋友Leonard，都不約而同啱啱享受完一個溫馨假期，幸福甜蜜盡寫在臉上。
張永霖離開話題多多嘅亞視之後，一直過住平靜嘅生活。張太話畀卓妮聽，佢哋三星期前啱啱去咗溫哥華度假，事關佢哋喺當地有間屋，兩公婆嘅節目就係拖手仔行吓公園，好開心、好寫意。張太仲幫老公擋駕，話暫時未有打算重出江湖喎。
陳浩寧踩單車遊老撾
至於Candice天氣咁凍佢都只係着住套薄身套裝同埋皮草披肩，顯得好單薄。不過佢話唔凍，因為以前喺美國讀書時凍慣咗，但係尋日佢都有抗寒法寶，就係喺套衫入邊黐咗暖包。Candice又話，佢同男友啱啱去完老撾玩，佢哋日日踩單車周圍去，當地冇乜交通燈，好舒服。計卓妮話，有男友陪伴周圍去，難怪佢着得咁少都唔凍啦！