中環出更：紫衣兵團沙田馬場晒冷
入馬場，有dress code。男士要紳士，女士要淑女。沙田馬場尋日出現一班「紫色兵團」，個個紫呔、紫冷衫、紫頸巾，仲有紫色碎花裙。大玩紫調有原因，英國經典服飾品牌Kent & Curwen舉行「百週年紀念短途盃」，紫色係Kent & Curwen招牌顏色，賓客聽晒代理該品牌嘅利邦集團主席馮國經（Victor）話，有咁紫，得咁紫。Victor嘅人面好廣，尋日喺馬場大晒冷。
Victor馮尋日同細佬馮國綸（William）請客，兩兄弟唔止玩紫色，仲一身Kent & Curwen搶鏡。Victor四年前收購呢個品牌，喜愛程度，唔使問都知。
食力簡重拾內衣情
William與阿哥同聲同氣，尋日由西裝、西褲、恤衫到領呔都不作他選，咪以為係專登做生招牌，原來William廿幾年前已愛上呢個牌子。做得主人家，Victor千金馮詠儀都唔失禮，以紫藍色短袖性感碎花長裙襯紫色禮帽，咁抵得冷，卓妮都要寫個服字。
Kent & Curwen粉絲無數，冠軍練馬師簡炳墀自爆當年除咗買西裝，連內衣褲都着佢，可惜呢條line後來停產，「食力簡」一度好失望。但呢份內衣情，將可以重拾嘞，利邦集團董事總經理王日明宣布好消息，話內衣褲已經重新面世。簡Sir聽到，睇怕會拿拿聲去入貨。
尋日天冷，馬會副主席葉錫安都着上Kent & Curwen西裝保暖，佢盛讚呢個牌子剪裁夠貼身，新衫試上身唔使點修改，頂多改短少少褲腳，不過佢西裝下襯咗件溫暖牌背心，原來係嫲嫲早年前織畀佢，有錢都買唔到。
盛智文都拉埋太太冒寒風撐場，「扮嘢文」呢日拒絕玩嘢Look，一身招牌黑西裝襯白恤衫。太太就醒目地喺手袋上綁番條紫色絲巾，成功貼題。
卓妮