政情：象哥為賀歲煙花奔波
農曆年初二晚，維港上空將綻放璀璨煙花，據聞今年有份贊助嘅香港海南商會邀請咗立法會進出口界議員黃定光（象哥）做煙花顧問。象哥話，近期經常忙於開會商討放乜嘢種類煙花、場地及嘉賓安排、電視直播時間等，仲要想辦法減低成本，相信要忙到初二放完煙花後至得閒。不過，象哥年初三就會隨即上中山間度假屋，搵鄰居工聯會會長鄭耀棠搞新春雀局。
今年冬季天氣好反常，最凍得幾度，象哥好識保暖，着番件中式棉衲，佢話件棉衲係去年到上海旅行時經朋友介紹度身訂造，薄薄哋但好夠暖，人工包料只係四百元人民幣，平靚正，當時佢太太亦訂造咗件「小鳳仙」裝旗袍。不過，象哥話現時咁凍天氣屬於正常，否則無人去百貨公司買褸，女士們仲慘，新衫無機會出場，所以天氣凍都唔係一件壞事喎。