政情：高靜芝「茄殊」做禮夠環保
農曆新年將至，拜年送禮唔少得，但原來送禮都可以講環保。尋日大埔有個環保活動，出席嘅婦女事務委員會主席高靜芝大談個人實踐環保嘅心路歷程。佢話每年多個大節日都會收到好多禮物，最怕就係禮物籃，不但包裝浪費，而且未必食得晒或用得晒，所以佢除咗將禮物轉贈有需要嘅人外，自己送禮亦唔會送花巧嘢，改送現金實際又環保。
除咗送禮講環保外，高靜芝都好支持簡約生活，平時盡力減少製造廢物，佢自嘲以前好蠢，經常亂花錢買好多衫返屋企，但後來發現好多衫未着過，甚至連招牌都未剪，浪費之餘，處理好費神。高靜芝話，現時佢學識每逢購物前都經過深思熟慮，有需要至買，一來避免為屋企製造垃圾，二來可以慳番唔少錢，識得用來投資仲會有回報添！
高靜芝尋日挽住一個以混合質料製造嘅Chanel手袋，原來個手袋係兩個月前到美國公幹時購買，佢話買嘢買貴啲都無所謂，最重要係實用和耐用，絕不會貪平買返屋企唔用。