政情：林健鋒踢過美國校隊
經濟動力尋日搞咗場「香港足球發展研討會」，探討本地球壇嘅未來，點知身為香港足球總會主席夫人嘅經濟動力立法會議員蘇菲梁劉柔芬遲到，要由經濟動力拍檔林健鋒（Jeffrey）代勞致辭，Jeffrey仲自爆少年時候做過足球小將添。
唔講唔知，Jeffrey喺美國讀大學時踢過校隊甲組，而且獲得唔少獎盃、獎牌。不過佢自嘲好彩美國嘅足球水準唔高，所以先踢到甲組，但可惜當年佢無發展落去，否則今日可能已經做緊教練或者體育界中人，唔使喺議會打滾。其實Jeffrey使乜咁唏噓，依家佢喺商界長袖善舞，經濟動力亦搞得有聲有色，話唔定佢喺體育界發展，成就無依家政界咁好呢﹗
講開尋日個研討會，約有二百人出席，當中不乏球壇中人，梗係唔少得蘇菲梁同老公梁孔德啦。本來蘇菲梁負責致歡迎辭，點知走上台嘅變咗Jeffrey，原來蘇菲梁因為要帶駐港領事參觀志蓮淨苑，所以趕唔切嚟，惟有臨時拉伕由Jeffrey頂檔。