政情：立會足戰四蛋派大狀
自二○○一年起未嘗敗績嘅立法會足球隊尋日又出賽喇。今次嘅對手係大律師公會足球隊，結果立法會大勝四比零，新年都總算有個好開始。以往立法會足球隊嘅入球大部分都係由外援射入，不過今次社民連嘅大舊陳偉業總算威番一次，佢喺上半場完場前撞入一球，打破立法會議員嘅入球荒。
今次立法會隊射入四球，其中至少三球都同大舊有關，點解？因為佢除咗射入一球之外，仲有兩球都係喺佢勁射「撻Q」之後，由外援捕捉機會補射入網。雖然大舊射術一般，但佢做柱躉式中鋒真係一流，有幾球都係靠佢用頭槌二傳製造埋門機會，連大律師公會嘅後備席都傳出驚嘆聲：「Set得靚喎！」
講開又講，公民黨幾位大律師尋日都冇現身，佢哋當中有幾位都做過大律師公會主席，唔通怕順得哥情失嫂意所以避席？現任大律師公會主席高浩文就有現身撐場，佢仲帶埋三歲半嘅囝囝Gus嚟添。高主席話，自己平時多數睇欖球比賽，唔係太好踢波，相反囝囝Gus就好喜歡喎！