政情：唐唐亂說教威嚇80後

青年智庫Roundtable尋日搞咗個青年學術會議，請咗曾經畀八十後掟鞋抗議嘅唐英年做主講嘉賓。本來以為佢會講吓政府又會推出乜嘢措施紓緩八十後不滿，點知結果啱啱相反。唐英年不但唔肯承認香港存在八十後問題，仲反過來暗批香港啲後生仔有五大思維缺陷。

唐英年首先強調一個真正成熟嘅公民社會，喺重視權利嘅同時，必須自覺承擔責任；言下之意話香港新一代要權但唔負責。第二樣佢叫年輕人唔好「搞思想壟斷」，不應「對持相反意見的人動輒口誅筆伐」，否則「剛愎自用加上勇往直前，最後很容易車毀人亡」！唐唐今次竟然出到詛咒呢招，莫非批評吓不同意見就要搞到車毀人亡乎？唐唐此言差矣。

第三樣佢強調妥協係民主嘅產物，香港嘅民主路唔能夠「關埋門做皇帝」，要學識折衷互讓，明顯係講緊政改方案同「五區公投」。第四係避免「將複雜問題簡單化」，唔好不問青紅皂白，任何事情一涉及政府同商界，就必然得到官商勾結、利益輸送嘅結論，結果只會令大家「懶於理性思考」。唐唐呢招變相係扣帽子，唔好好反省之餘，仲為政府重商輕民、偏幫大財團辯護。

引美眾議員槍擊案作例

最後唐英年仲話，「香港人絕對不願意看到政治或社運引致流血，當底線不斷被衝擊，不斷倒退，我們就有可能走上一條不歸路」，並以美國近日發生嘅眾議員槍擊案做例子，講到香港啲八十後揸住支火箭炮同機關槍示威咁，完全比喻失當，脫離事實，難怪即場有年輕人批評唐唐抹黑。

記得中央政策組同港大早前公布嘅八十後研究報告，指逾七成青年唔信政治人物講嘢。好似唐唐咁嘅政治人物，年輕人就咪信喇，否則真係「信佢一成，雙目失明」！