中環出更：潮青「家己冷」晒團結
青年被視為薪火相傳嘅希望，好多商會及社團都有組織青年委員會加強聯繫。好似香港潮州商會青年委員會前晚就搞咗個團年聯歡晚會，一班潮青才俊踴躍出席以示團結。卓妮去到會場，除咗見到潮州商會會長陳幼南、會董張俊勇（Thomas）及青委會新主任陳光明外，仲有大生地產董事馬清揚、觀瀾湖球會副主席朱鼎健（Ken）及胡氏成豐集團掌舵人胡炎松等，人才濟濟。
潮州故事拍成電影
會長陳幼南喺晚會上勉勵大家齊心協力為潮州商會辦事，彰顯潮州人嘅團結性，又透露商會稍後會將潮州嘅故事拍攝成電影搬上銀幕。其實上述多名青年才俊加入潮青多年，好似Thomas喺九二年成立時已加入，阿Ken就九五年加入，胡炎松亦加入咗五年，唔單止咁，佢哋喺爸爸嗰代已經相當熟落，所以坐埋一齊時十足一家人，大家「家己冷」團結一致。
不久前由張俊勇手中接棒做青委會主任嘅陳光明，係彩星玩具創辦人陳大河嘅孫，佢加入潮青十幾年，嚟緊會籌辦社區活動，包括探訪長者及孤兒，期望將潮州文化帶入每個家庭。聯歡晚宴上，卓妮都有同馬清揚傾吓偈，佢承認潮州人傳統比較重男輕女，但佢自己就無分彼此，一視同仁對待幾個仔女，仲自爆佢嘅港姐太太錢慧儀話佢錫晒個女添！
阿Ken朱鼎健當晚剛由海南觀瀾湖飛落深圳，之後隨即坐車來港出席團年晚宴。當然喇，自己都係潮青，點可以唔支持?!