中環出更：台胞新春宴猛人齊撐場
呢兩日天氣終於回暖，一眾城中名人紛紛出籠。前日中聯辦喺大會堂美心酒樓舉行香港嘅台灣同胞新春酒會，新到任約兩星期嘅中聯辦副主任殷曉靜首次公開亮相，台灣幫、福建幫同廣東幫等社團政商名流齊撐場，氣氛好熱鬧。
中聯辦最近有高層人事變動，新調派來港嘅殷曉靜分管台灣事務，讓副主任黎桂康專注做協調工作，為未來幾場選舉做準備，所以當晚黎桂康冇現身，由殷曉靜主持大局。新官上場，城中名流無分籍貫畀足面撐場。
今年連酒會安排也異於往年，台灣幫成為酒會主角，企喺最前面。台籍人士難得咁齊人共聚一堂，好似城大校長郭位、珠海學院校長張忠柟、前中大校長金耀基等人都蒲頭。卓妮見到亞洲聯合財務（UA）老細長原彰弘，佢間UA生意愈做愈旺，近年積極北上神州開分店，好彩有囝囝長原京毅幫手打江山。不過長原彰弘有感於港台第二代企業家嘅交流唔係好緊密，正密謀撮合香港菁英會同台灣企業家第二代交流，讓大家擦出火花。
粵閩名流 空群而出
同台灣血濃於水嘅福建幫頭領楊孫西、洪祖杭、施子清同盧文端，都現身撐場。楊孫西去年先後率領茶文化國際協會及茅台之友會訪台，實行以茶、酒會友，廣結台灣政商界朋友，遲啲仲會邀請佢哋訪港。盧文端嘅姨媽定居台灣，同台灣人零舍同聲同氣，佢打算同台灣朋友喺天津投資電子行業，拍住搵真銀。
除咗閩台猛人空群而出，廣東幫陣容都唔弱。基本法委員會副主任梁愛詩、全國政協常委陳永棋、「零食大王」戴德豐、廣東社團總會主席王國強等人亦都抽身嚟到。內地省市陸續開人大、政協「兩會」，政界人士又要準備開馬拉松會議。戴德豐話近年七成時間用喺政協工作上，好彩四洲集團有老婆撐住，三個子女又學成歸來幫手，佢先至可以瞓身做公務，令到「零食大王」招牌屹立不倒。
曾任中總會長嘅陳有慶、霍震寰前後腳嚟到，陳有慶話近排天寒地凍，佢嘅禦寒秘訣係喺健身房跑步，難怪精神爽利。
卓妮