本港被揶揄為文化沙漠，唔少創作人曾開腔批評港府對佢哋諸多掣肘，進行政治審查，扼殺生存空間。不過，商務及經濟發展局局長劉吳惠蘭（Rita）尋日喺立法會面對議員質問，一於少理，仲搬舞台劇《東宮西宮》上枱，直言該劇目充滿政治諷刺味道，可見本港「創作空間無限」喎。須知道《東宮西宮》以批評港府聞名， Rita今勻真係搬石頭砸自己隻腳囉！
《東宮西宮》係首個諷刺本港政治窘局嘅舞台劇系列，連公民黨陳淑莊未做立法會議員之前都粉墨登場客串過。舊年搬上舞台嘅系列九更以「十大九官」為名，開宗明義數盡三司十二局司局長及一眾冇人識嘅副局政助。身為問責局長嘅Rita當然無一幸免，被狠批出trip多過留港，港人對佢印象唔深，仲被譏為「模糊惠蘭」。
Rita畀人譏諷，唔覺面懵仲好意思借人過橋，唔知身為舞台劇編導嘅胡恩威聽到後會唔會偷笑？