政情：文富穩落選 發叔響警號
村代表選舉暗湧四起，多個原居民代表議席，今年都遇上新人落場挑戰，兵兇戰危。好似前日舉行嘅元朗新田鄉永平村原居民村代表選舉，角逐連任嘅新田鄉事委員會主席文富穩，爆冷以三票之差落敗，輸咗畀一個叫文志生嘅新面孔。由於文富穩係「新界王」劉皇發陣營嘅人，新界人人心思變，為鄉議局主席劉皇發競逐連任龍鼓灘原居民代表，響起紅色警號。
文富穩多年嚟循原居民村代表身份，進身新田鄉委會主席，跟手做埋元朗區區議會當然議員，長勝將軍今次喺村代表中敗陣，得票八十八票，輸畀取得九十一票嘅文志生，現時鄉委會主席同區議員兩個職位，亦都會一併失去。
有分析話，文富穩爆冷輸畀一個政壇名不見經傳嘅對手，加上早前梅窩鄉事委員會涌口（北）居民代表黃福根同白銀鄉原居民代表黃偉才，亦雙雙競逐連任失敗，反映新界人已暗中起革命，想推翻舊有勢力。所以，廿三日輪到鄉議局主席劉皇發競逐連任龍鼓灘原居民代表，話唔埋會大熱倒灶，大家不妨拭目以待！