政情：新民黨錯英文 葉劉燒鬚
政務官出身嘅新民黨主席葉劉淑儀，一向對英文要求高，最經典一幕，係○九年去信立法會內務委員會主席劉健儀，點評「唐唐」唐英年投訴社民連三子爆粗掃場嘅信中，英文文法錯誤連連，成為政壇熱話。新民黨前日正式成立，尋日喺多份報章賣全版廣告，公告天下，點知錯誤地將「就職禮」嘅英文「Inauguration」，串錯寫成 「Inaugueation」，雖然係職員手民之誤，但身為掌門人，葉劉可以話老貓燒鬚。
「簡直令我蒙羞」
葉劉解釋，前日就職禮結束後，三名職員攞住張眾黨領導層喺寫住「新民黨成立典禮」中英文大字布景板前嘅大合照，趕到報館付印，點知照片反光，職員要臨時「加工」，填寫睇唔清楚嘅英文字，忙中有錯，串咗個「Inaugueation」出嚟。新黨初創，領導層「就職」出瑕疵，意頭問題事小，打爛英文了得嘅齋缽事大，葉劉半嬲半笑話：「簡直令我『蒙羞』，大家都知我一向對英文睇得好緊㗎嘛！」