政情：羅富昌勁彈星酒店服務
新加坡近年大搞賭業，新落成嘅濱海灣金沙酒店加入戰團後，發揮「吸金」功能，可謂旺丁又旺財，廠商會第一副會長羅富昌都趁聖誕貢去湊熱鬧，入住酒店幾日，可惜失望而回。佢盛讚酒店裝潢華麗，但服務水準未到位。
廠商會尋日設宴，會長黃友嘉率領多位副會長齊亮相，啱啱遊完獅城充電返嚟嘅羅富昌最風騷，佢話此行奇遇多，本來帶晒泳褲，直奔金沙五十五樓頂層嘅無邊際泳池，點知寒流偷襲，氣溫急降至廿度，喺室外戲水，都咪話唔凍。於是佢索性返酒店大堂搵其他節目，順便查詢食早餐時間及無線上網服務，點知服務員態度敷衍，答非所問，令佢好失望。
唯一收穫，係見識咗金沙賭場繁華一面。羅富昌盤算緊投資賭業股，考察完金沙後，更確信眼光無錯，嚟緊仲會加碼掃貨。不過炒股始終有風險，記緊做好風險管理喎。
黃友嘉帶隊 中東尋商機
廠商會高層農曆新年驛馬星動，初二晚出發去中東考察，由會長黃友嘉帶隊，走訪杜拜、科威特及沙特阿拉伯，中東資源豐，熱錢多，商機無限。同場仲有工展會嘅領軍人物、廠商會副會長施榮懷，佢報喜話，今屆工展會丁財兩旺，嚟緊四月仲會添食，喺旺角花墟公園舉行第二屆食品嘉年華！