政情：鬍鬚曾那渣招硬銷申亞
港府申辦二○二三年亞運會撥款大戰在即，今個星期五立法會財委會一決生死，高官近日出盡全力為呢場民意戰造勢。繼煲呔曾親率高官出席撐申亞大會後，佢同姓「細佬」鬍鬚曾曾俊華亦唔放過曝光機會，為新聞處拍短片谷申亞，不過，佢唔敢同民間反申亞民意硬碰，竟然諗到擺母校喇沙書院班學弟上枱。
政府新聞處尋日推出一條長約四分鐘嘅新聞短片，叫「財爺傳劍術，教化年輕人」。受君俸祿，新聞處作為政府部門，為高官粉飾櫥窗，見怪不怪，但呢輯短片卻係項莊舞劍，意在沛公，並非表面上談劍論教咁簡單。
宣傳片掛羊頭賣狗肉
一向自詡玩西洋劍了得嘅鬍鬚曾，依家每星期返母校喇沙書院教授劍擊，佢尋日約班師弟到官邸，慶祝喇沙書院喺上月一個校際劍擊賽中勇奪總冠軍，並即場露兩手同師弟練劍，一時間財政司司長官邸之內刀光劍影。短片中，鬍鬚曾着上一套劍擊賽事用嘅黑色全身保護衣，同師弟格嚟格去，當師弟練習攻防動作過關，鬍鬚曾仲會給予鼓勵，企定定畀師弟用劍拮自己心口。古有哪吒割肉還母，今有鬍鬚曾拮肉獎師弟，佢可能覺得好感人，所以短片濃筆重墨記下有關嘅片段。
去到尾段，真正戲肉嚟嘞。幾位喇沙學生對住鏡頭，稱讚鬍鬚曾係佢哋嘅榜樣，點知片段失驚無神播出一句旁白：「提到申亞，佢哋都支持申辦二○二三年亞運會！」然後，短片播出三位喇沙學生支持申亞嘅訪問，個個喺鏡頭前撐申亞，成為港府硬推申亞、圍攻政黨嘅馬前卒之一。全長數分鐘嘅短片，原來臨尾呢三十秒先至係戲肉。
撥款大戰前出盡法寶
鬍鬚曾披甲上陣，原來唔係教劍，而係為港府申亞撥款闖關做先鋒，長劍出，有的放矢。不過，鬍鬚曾或者揣摩到劍擊之技，但劍道精神就學唔到，武俠小說中嘅劍客行事磊落，但鬍鬚曾為港府申亞出招，卻拐彎抹角，「傳劍術」只係幌子，「教化人」都係假嘅，其實係一輯申亞宣傳片，變相擺咗班喇沙書院學弟上枱，出盡法寶為周五嘅申亞撥款造勢。鬍鬚曾為撐申亞不惜借學弟過橋，小心唔只心口畀人拮，背脊肯定被插到花晒。