中環出更：馬偉明改裝Prada至Hit皮褸
時裝設計師一向眼利，潮流觸覺快過人，好似著名時裝設計師馬偉明（Walter），唔只鍾意買名牌，仲喜歡改裝名牌，好似早前佢出席2011年皮草設計比賽，就以Prada啡色皮褸襯Prada啡紅色皮鞋，型格十足。Walter自爆件皮褸經過改裝，改短衫袖同膊位。今次改衫由專門店師傅操刀，但佢笑言有時自己都會出手。
購物狂食晏不忘「朝聖」
Walter鍾情Prada十多年，香港未有專門店之前，就飛去米蘭入貨。Walter話，唔鍾意太loud（鮮艷）、太誇張嘅時裝，Prada優雅簡潔，散發高貴品味，啱晒佢。
佢又自爆係超級購物狂，中午食晏一有空就貢去離公司不遠嘅尖沙咀海港城逛街，梗唔少得去Prada朝聖。身上呢件剪裁貼身嘅皮褸，就係今季最hit新貨，售價約數萬元，買得多，仲做埋Prada VIP添。