中環出更：積蘇潮着減肥波鞋惹注目
減肥瘦身唔係女士專利，政商界追求健美身段嘅男士，大有人在。前日香港大學舉行「百周年啟動禮」，政商名人雲集，其中人稱「積蘇」嘅香港貿易發展局主席蘇澤光着住瘦身運動鞋Skechers到場，將社交活動變成瘦身運動。
吸引馮國經阿松視線
尋日陽光普照，利豐集團馮國經、前財政司司長梁錦松同積蘇出席啟動禮時，齊齊戴上有型墨鏡，不過，馮國經同阿松着皮鞋，積蘇就着波鞋，拍埋兩人度，成個人年輕幾歲。
馮國經同阿松一見積蘇，就大大聲指住佢對鞋問：「你對鞋咁得意嘅！」積蘇就笑笑口答：「係呀，方便減肥吖嘛。」
馮國經同阿松一聽，恍然大悟，對住積蘇對鞋繼續指手畫腳，高談闊論，神情同闊太講瘦身美肌一樣咁興奮。
積蘇所指「方便減肥」嘅鞋，其實係佢對Skechers波鞋，有獨特嘅特厚楔形鞋底設計，據聞着住行路可以加速熱量消耗，強化肌肉，唔怪得積蘇成日都咁年輕啦。