中環出更：扮嘢文試agnes b新衫無啱身

扮嘢文近年進軍成都，將中環蘭桂坊帶到當地，實行中港兩地跑，忙到shopping變成奢侈嗜好。前日匯賢智庫主席葉劉淑儀成立新民黨，扮嘢文身為該黨顧問，幾忙都去撐場。

散場後，由柴灣飛車去中環ifc逛一陣街。嗰陣係下晝五點幾，扮嘢文喺商場左逛右逛，先喺連卡佛兜個快圈，逛咗幾分鐘，都係睇唔啱，喺門口撞見三位女士，熱情地上前同佢打招呼，扮嘢文果然粉絲多。

偷閒逛街嘅盛智文（右），邊行邊回覆SMS，夠晒忙。	行行吓街撞到老友，盛智文（左一）停低打招呼。	入到去agnes b睇恤衫，盛智文（左）捉住店員查詢新貨情況，可惜冇啱身嘅恤衫尺碼。

讚用料靚 設計簡潔

Say goodbye後，扮嘢文都係唔甘心，行去名店agnes b「尋寶」，即時被新上架嘅恤衫吸引，仲捉住店員查詢新貨情況。點知扮嘢文神龍見首不見尾，入去更衣室轉咗個圈後就唔見人。卓妮打番電話問佢買咗乜？扮嘢文話：「冇呀，我最終冇買到，因為size唔啱。」原來佢着開size 2或者size 3，但貨架上只剩尺碼較大嘅size 4，扮嘢文唔鍾意衣不稱身，寧願唔買。

不過，扮嘢文盛讚agnes b時裝用料靚，設計簡潔，但直言唔算係忠實粉絲，只係咁啱經過，入去睇睇，真係坦白。

卓妮