政情：范太掃花膠分三份贈家人
仲有唔夠一個月就到農曆新年，精打細算嘅全國人大常委范徐麗泰尋日出席一個活動嘅時候，大手筆掃咗六千六百元花膠當辦年貨。范太笑笑口話，佢一個人點食得咁多吖，實情係要三家人分，原來佢係廿四孝媽咪。
帶唔夠錢 姑仔幫手
踏入第五屆嘅本地漁農美食迎春嘉年華，尋日喺旺角花墟公園舉行。年年都捧場嘅范太自爆，呢項活動經已成為佢辦年貨嘅地方，當然佢唔係得把口啦，事關佢帶定五千幾蚊嚟掃貨，絕對唔係講笑。
花膠呢啲含豐富骨膠原嘅食品最啱女士，貪靚嘅男士都啱食，范太精挑細選咗十塊左右，點知找數嘅時候發現帶唔夠錢，要同行嘅姑仔幫手。范太話佢囝囝託佢買，佢先至買咁多咋，分完畀家人嗰啲就自己食，況且佢平時食得唔多，幾塊都夠食成年。同場仲有只係買咗幾盒雞仔餅嘅漁農界立法會議員黃容根，以及滿場飛嘅民主黨議員李華明，佢哋兩位試飲即製嘅南瓜龍躉湯之後都大讚好飲。